19. Ke osele lefatsheng, o se ke wa mpatela ditaelo tsa hao.
20. Moya wa ka o robehile ke ho hlolohelwa ditaelo tsa hao kamehla.
21. O laya baikakasi, e leng batho ba rohakilweng, ba fapohang ditaelo tsa hao.
22. O ke o tlose sekgobo le nyediso ho nna, kahobane ke boloka dikeletso tsa hao!
23. Esita le marena a dutse ho rera morero wa ho ntwantsha; mohlanka wa hao o nahana dikomelo tsa hao.
24. Dikeletso tsa hao le tsona ke menyaka ya ka le baeletsi ba ka.
25. DALETH. Moya wa ka o maname leroleng; ako mphedise ka lentswe la hao!